CAGAYAN DE ORO CITY-Ipadayon sa kontrobersyal nga si Supt Jovie Espenido ang paglimpyo batok sa ilegal nga droga nga gipakatag sulod sa Ozamiz City.
Kini human unang gimanduan ni Pres Rodrigo Duterte si PNP chief Dir Gen Oscar Albayalde nga ibalik si Espenido nga mangulo sa Ozamiz City Police Office epektibo kagahapong adlawa.
Gihimo ni Duterte ang kamanduan pinaagi sa on the spot nga pagtawag kang Albalyade atubangan sa Ozamiznons nga unang nag-rally kaniadto aron ibalik si Espenido sa maong syudad.
Si Espenido ang gitahasan ni Duterte pagbungkag sa grupo ni Parojinog Sr sukad Hulyo 30,2017.
Samtang,gihulat sa PNP-10 ang pormal nga mag-report ni Espenido gikan sa PNP-8 sugod ning adlawa.
Kini aron mahataga’g order sa PNP-10 si Espenido nga subli panguluhan Ozamiz City Police Office sa Misamis Occidental.
Miingon si PNP regional spokesperson Supt Surkie Sereñias nga nakita na nila ang order diin si Espenido na lamang ang ilang gihulat nga mo-report sa Camp Alagar alang sa pormal nga pagdestino kaniya sa Ozamiz City.
Sulod sa kapi’g tuig nga liderato ni Espenido,nabungkag niini ang Parojinog Drug Syndicate Group diin nag-resulta sa kamatayon ni Parojinog ug pagkasikop sa anak nga si Vice Mayor Nova Princess Parojinog niadtong Hulyo 2017.
