CAGAYAN DE ORO CITY-Wala gisalikway sa Scene of the Crime Operatives o SOCO nga posibleng dunay foul play sa kamatayon sa negosyanteng Korean national nga nahulog sa 5th floor sa Smart Condominium, Zone 8 sa Bgry. Canitoan ning syudad.
Giila ni SOCO-10 investigator Police Insp Paul Jean Ragmac ang biktima nga si Jung Sangyong, 45 anyos, minyo ug nagpuyo sa South Korea.
Miingon si Ragmac nga natusok sa tubo ang tu-ong tiil sa biktima human matagak sa gawas nga bahin sa iyang gisak-an nga condo unit.
Nagbaton usab kini’g samad sa iyang ulo human gitoohang napakog sa pader sa iyang pagkahulog.
Unang nilugwa sa inisyal nga imbestigasyon nga nahulog ang biktima samtang lango sa ilimnong makahubog.
