CAGAYAN DE ORO CITY-Hiniusa nga gipadayag sa kumanders sa Moro Islamic Liberation ug Moro National Liberation Front ang kusganon nila nga suporta nga maapil ang unom ka lungsod sa Lanao del Norte sa Bangsamoro Autonomous Region in Muslim Mindanao o BARMM.
Kini human sila tapuka sa grupong Pakigdait Incorporated aron ipakusog ang pagsuporta sa plebesito sa Bangsomoro Organic Law o BOL sa maong lugar.
Miingon si Musa Mohamad Sanguila, board secretary sa Board of Interfaith Leaders sa Pakigdaig Incorporated nga gusto nila’g tinud-anay nga kalinaw rason nga suportado nila ang paningkamot sa gobierno, MILF, MNLF ug ubang sektor sa nasud.
Himoon ang plebesito sa BOL sa Nunungan,Tangkal, Balo-i, Munai, Tagoloan Dos ug Pantar sa Pebrero 6 ning tuiga.
