CAGAYAN DE ORO CITY-Gibulgar ni Lanao del Norte Gov Imelda Dimaporo nga nakadawat na usab kini’g laing bahad sa kinabuhi.
Gihimo ni Dimaporo ang pahayag dungan sa kadaugan sa ‘no’ votes batok ‘yes’ sa Bangsamoro Organic Law o BOL plebisite sa Lanao del Norte ning semanaha.
Apan miingon si Dimaporo nga posibleng naggikan sa kontra nila sa politika ug dili sa MILF ang bahad.
Nagtoo si Dimaporo nga dili gikan ni Abdullah Macapaar alyas Kumander Bravo ang bahad kay anaa pa gihapon niini ang pagtahod kaniya isip Maranao-Muslim.
Nagtoo usab kini nga nga dili madawat sa katawhan ang tinguha nga maapil ang unom ka lungsod sa lalawigan sa Bangsamoro Autonomous Region in Muslim Mindanao o BARMM.
Una niini, gipasalig sa Bombo Radyo ni MILF vice chairman Gadzhali Jaafar nga tahuron nila ang resulta sa plebisito kon ugaling magmadaugon ang ‘no’ votes sa Lanao del Norte.
