CAGAYAN DE ORO CITY-Gipangayo karon sa Moro Islamic Liberation Front o MILF ang suporta sa publiko ilabina kadtong nag-kuwestiyon sa Bangsamoro Organic Law o BOL nga tugtan sila mapatuman sa gobiernong Bangsamoro.
Gihimo ni MILF Vice chairman Gadzhali Jaafar gumikan sa pagduda sa mga kritiko nga dili makatubag sa kawad-on sa rehiyon ang BOL nga bag-uhay lamang gipaubos sa plebisito sa pito ka probinsya ug duha ka syudad sa Mindanao.
Namahayag si Jaafar nga matubag ang mga pangutana kon epektibo ang pagdala nila sa Bangsamoro region oras nga sugdan na ang pagdumala niini.
Samtang angay tahuron ang katungod sa katawhan nga nagpabor ipalig-on ang Bangsamoro Organic Law o BOL sa mga probinsya ug rehiyon nga masakop sa Bangsamoro Autonomous Region in Muslim Mindanao o BARMM.
Kini ang komento ni Regional Peace and Order Council o RPOC chairman City Mayor Oscar Moreno dungan sa paghagit sa Bangsamoro govt nga tinud-anay ipatuman ang mga probisyon sa BOL alang sa rehiyon.
Sa pikas bahin,gihinaut usab ni Gov Bambi Emano nga unta maayo ang transition sa Autonomous Region in Muslim Mindanao o ARMM govt ngadto sa BARMM aron epektibo ang BARRM nga kusganon usab niya nga gisuportahan.
Samtang ilugwa na sa Commission on Elections o Comelec ang resolusyon nga mopalig-on sa balaod sa Bangsamoro govt diin modumala sa 7 ka probinsya ug duha ka syudad sa Mindanao.
Kini alayon sa subli pagtigom sa Comelec en banc aron ipakusog ang official results sa BOL plebisite nga gihimo sa North Cotabato ug Lanao del Norte sa miaging semana.
Namahayag si Comelec regional director Atty Reynato Magbutay nga dili na madugay ang pag-ratify sa BOL kay gihulat na usab ni Pres Rodrigo Duterte ang resulta niini aron makasugod na ang Bangsamoro govt sa rehiyon.
