CAGAYAN DE ORO CITY-Nakit-ang pulos patay ang duha ka ginang sa magkalahi nga lugar sa syudad ug lalawigan sulod sa 24 oras.
Kini human unang nakit-an sa kasagbutan nga bahin sa Rotunda,Brgy Macasandig ang city hall employee nga si Helen Rivera,40 anyos,minyo nga taga-Pag-asa,Sitio Bolonsiri,Brgy Camaman-an sa dakbayan.
Gibutyag ni SPO2 Joel Tare,imbestigador sa Macasandig Police Station nga bugtong gamay’ng lagom lamang sa lawas ang nakita sa biktima nga posibleng pinaakan sa mananap.
Kini ang hinungdan angay ipaubos sa otopsiya ang patay’ng lawas sa biktima aron masuta ang hinungdan niini.
Samtang nakit-an usab nga wala na’y kinabuhi ang senior citizen nga lola sa Zone 13,Brgy Natumulan,Tagoloan,Misamis Oriental.
Giila ni PO1 Aljun Linaban,imbestigador sa Tagoloan Police Station ang biktima nga si Celsa Dalapag,66 anyos,single mom ug nagpuyo sa maong lugar.
Miingon si Linaban nga daan nang naghambin sa sakit sa kasingkasing ang biktima subay sa sulti usab sa anak niini.
Kumbinsido ang PNP nga walay foul play sa kamatayon sa biktima ilabina nga wala maunsa ang kabtangan sulod sa gikatulgan niini nga pinuy-anan.
