CAGAYAN DE ORO CITY – Pasado alang sa Citizen Watch for Good Governance o CWGG ang performance ni Pres Rodrigo Duterte isip pangulo sa nasud.
Kini alayon sa ikaupat nga State of the Nation Address o SONA nga himoon ni Duterte sa Batasang Pambansa sa adla’ng Lunes sa hapon.
Miingon si CWGG convernor Atty. Antonio Soriano nga maayo ang nahimo sa presidente ug giaghat pa niini nga mobuhat pa sa daghang kaayuhan.
Gihagit usab ni Soriano si Duterte nga mohimo pa’g dugang mga proyekto nga ikaayo sa katawhan sa nasud.
Gihatagan sa grupo sa grado nga 7 ngadto 8 ang performance ni Duterte bisan kon may mga kapalpakan kini ilabina sa kontrobersyal nga pagpatuman niini sa anti-illegal drugs war batok sa drug pushers ug users.
Samtang gilauman sa religious sector nga madungog kang Duterte sa iyang SONA ang mahitungod sa kampanya niini nga war on drugs sa nasud.
Miingon si IFI Bishop Felixberto Calang nga gusto nilang masayran kon may bag-o na ba nga estratihiya ang pangulo sa kampanya niini ilabina nga libuan na ka tawo ang nakabsan sa kinabuhi tungod sa war on drugs.
Masaligon usab si Calang nga ibatbat ni Duterte sa iyang SONA ang pagpadayon sa naputol nga peace talks tali sa gobierno ug CPP-NPA-NDF.
Hisayran nga daghan ang mibatikos sa war on drugs sa presidente apan adunay uban nga nagtoong dako kinig kontribusyon sa pag-ubos sa kremin sa nasud.
