CAGAYAN DE ORO CITY – Kumbinsido si City Mayor Oscar Moreno nga dili lamang usa apan daghang variant mutations na sa COVID-19 ang aktibo dinhi sa syudad.
Gihimo sa mayor ang komento nunot sa nagsobra gatos nga pagsaka sa kaso sa COVID sa dakbayan sulod lamang ning semanaha.
Miingon si Moreno nga unta dili na hulaton sa katawhan nga mahimo pang vaccine-resistant ang klase sa mga bayrus nga miigo sa ilang panglawas sama sa delta variant nga sugod Hunyo pa nakasulod sa dakbayan.
Samtang dismayado usab si Moreno sa PNP nunot sa sugyot nga angay ipaubos sa ‘granular lockdown’ tungod sa pagsaka’g maayo sa kaso.
Gitawag sa mayor nga ‘bookish’ kadtong naghingusog niini sanglit nag-antos na sa ECQ ang katawhan sa dakbayan.
Samtang angayang kahadlukan ang dala nga grabeng kabangis sa COVID-19 delta variant nga aktibo nga nakasulod sa Northern Mindanao partikular dinhi sa syudad.
Ingon ani ang paghulagway ni NMMC liason officer Dr Bernard Julius Rocha kon unsa ka peligro kon makatakod ang delta strain sa lawas sa tawo partikular sa mga wala pa sukad nabakunahi.
Miingon si Rocha nga kon natakdan pagbalik sa bayrus ang ilang mga kauban sa NMMC nga halos tanang bakunado,mas peligro sa mas grabeng epekto kadtong padayong nagbaliwala sa maong proteksyon.
