CAGAYAN DE ORO CITY – Dili talikdan apan kuyugan sa tanang panahon ni 2023 presumptive city mayoralty candidate Jose Gabriel ”Pompee” La Viña ang pagpangalad ni Cagayan de Oro 1st District Cong. Lordan Suan.
Gihimo ni La Viña ang pahayag nunot sa gisulti ni Suan nga bukas kini sa pakig-alyansa sa ubang dagkong politikanhong personalidad isip tubag sa paghiusa sa puwersang City Mayor Rolando ‘Klarex’ Uy ug Cagayan de Oro 2nd District Congressman Rufus Rodriguez.
Namahayag si La Viña kinsa kanhi Phividec administrator & undersecretary sa Department of Agriculture & Tourism nga kini ang higayon nga ipabati sa partido Padayon Pilipino ang lig-ong pagsuporta ngadto kang Suan nga bag-o pa lang sa kalibutan sa politika sa syudad.
Siya miingon nga gihatag niya ang gatos-porsientong pagpaluyo kang Suan dihang nadunggan niini gikan kaniya nga gitabangan na kini sa duha ka dagkong mga pamilya sa politiko sa dakbayan.
Dugang usab niini nga dili angay kalimtan sa mga aktibong sakop sa partido ang sulti kaniadto ni Padayon Pilipino founder late City Mayor Vicente ‘Dongkoy’ Emano nga tim-os nga pag-alagad ang kanunay ipagtigbabaw ug dili ang konbenyente lamang sa pakig-alyansang-politikal.
Gihimo ni La Viña ang pasidaan epekto sa nakaabot kaniya nga impormasyon nga giingong may pipila ka sakop sa partido nga milukso na sa mga Uy aron atbangan si Suan.
Dumduman nga sa wala pa gipildi ni Suan pagka-kongresista ang bise-mayor kaniadto nga si Rainer Kikang Uy sa eleksyon,nagbinugtong kining representasyon sa partido ug giipit sa pipila ka benepesyo nga alang unta sa sakop sa konseho.
Una nang namahayag si La Viña sa interbyu sa Bombo Radyo nga subli niya itanyag iyang kaugalingon pagkandidato isip mayor kuyog sa posibleng pakig-alyansa Padayon Pilipino ug ubang grupo nga mokuyog sa dad-ong kabag-uhan alang sa katawhan sa Cagayan.
Hisayrang sila La Viña, Suan ug Rodriguez ang kaatbang sa grupo ni kanhi City Mayor Oscar Moreno diin si Klarex lang nakalusot sa top local elective position sa miaging May 2022 elections sa syudad.
