CAGAYAN DE ORO CITY, Philippines – Paslak na sa prisohan ang mga suspek nga nadakpan sa managlahing operasyon sa Police Units sa Police Regional Office -10.
Gidayeg ni PRO-10 Director Brig. Gen. Jaysen de Guzman, ang managlahing checkpoints sa rehiyon human kini nagresulta sa malampusong pagsanta sa mga tigpayuhot sa ilegal nga druga sa Bukidnon ug Iligan City.
Gilusad ang drug buybust operation sa Bukidnon Provincial Police Office (BPPO) ug Iligan City Police Office (ICPO) niadtong Sabado, Enero 25 hangtud Lunes nga nagresulta sa pagkompiskar sa 1.8 Milyon pesos nga kantidad sa gitoohang shabu.
Samtang, malampuson nga nadakpan sa kapulisan ang suspek nga nalambigit sa pagpangawat sa motor pinaagi sa checkpoint operations sa Alubijid, Misamis Oriental.
Gikan gahapon, misumada na sa 1,392 checkpoint operations ang gilusad sa Misamis Oriental Police Provincial Office sugod Enero 12, nga naglangkob sa 25 ka munisipalidad ug upat ka maneuvering units sa lalawigan.
