CAGAYAN DE ORO CITY, Philippines – Gihingusgan ni Commission on Elections Chairman Atty. George Erwin Garcia nga ma-rebyu ang guidelines sa paggamit sa AKAP, ilabe sa panahon sa nagkaduol nga piliay.
Gihimo ni Garcia ang pamahayag human lantaran nga gigamit sa mga tawo sa kandidato ang maong programa isip hinagiban sa ilang pagdagan sa usa ka posisyon.
Namatikdan sa kampo ni Garcia ang harapan nga social media campaign sa mga barker sa politiko nga mipalanog nga – silang mga kongresista ang rason kung nganong adunay madawat ang katawhan nga Ayuda sa Kapos ang Kita Program (AKAP) ubos sa implementasyon sa DOLE ug DSWD.
Una niini, gikompirmar sa opisyal nga ang Comelec Law Department, miabante na sa ilang pagrepaso sa guidelines sa pag-apud sa AKAP aron masiguro nga walay pag-abuso sa mga pondo sa gobyerno.
Lakip sa girekomendar sa poll body ang pagdili sa pag-display ug pag-distribute sa mga posters, banners, o bisan unsang materyales nga nag-link sa mga politiko sa AKAP, ingon man ang presensya sa bisan unsang politiko sa aktwal nga distribusyon sa ayuda.
Ang AKAP usa ka programa nga naghatag sa pinansyal nga tabang alang sa mga indibidwal nga naapektuhan sa pagsaka sa inflation ug alang sa mga adunay kita nga ubos sa minimum wage.
Ang DSWD, DOLE, ug NEDA nagtrabaho aron masiguro nga ang mga pondo ug personnel sa DSWD dili magamit o maabuso alang sa personal o politikal nga interes.
