CAGAYAN DE ORO CITY – Gimanduan sa Regional Trial Court o RTC Branch 41 ang Local Water Utilities Administration o LWUA nga mohunong sa ilang full intervention sa Cagayan de Oro Water District o COWD ning syudad.
Kini maoy paborabi nga gitaho sa pipila sa mga abogado sa nag-petition sa korte pinaagi kang Atty. Greg Pallugna nga mohatag sa ilang paghubad sa balaod kung aduna ba’y ensaktong hurisdiksyon ng LWUA nga sudlon ang mga kalihukan sa COWD ug palingkuran sa interim board of directors ug management.
Namahayag si Pallugna nga kadaugan kini dili lang sa iyang mga kliyente apan mismo sa katawhan sa dakbayan.
Una niini,gisaysay sa korte nga dili na angay ipadayon sa LWUA ang pagpatuman sa ilang resolusyon 34 nga gisugdan sa tuig 2024 kabahin sa mga kalihukan sulod sa COWD.
Dumduman nga nagsugod ang full intervention sa LWUA subay sa sugo ni Pres Bongbong Marcos nga pangitaan sa sulbad ang sulirang-pinansyal tali sa Cagayan de Oro Bulk Water Incorporated o COBI ug COWD.
Kini tungod kay napugos pagputol sulod sa usa ka adlaw sa suplay sa tubig ang COBI kay nagdumili pagbayad ang COWD sa minilyong obligasyon niini sa maong kompanya.
Nakaabot kini sa atensyon ni Marcos rason usa ang maong isyu nga iyang gituki sa pagbisita niini sa syudad sa miaging Mayo 2024.
Apan sa pikas bahin,midangop usab sa korte ang petitioners diin nakakuha’g mando nga ibalik na’g kutay ang tubig alang sa mga tawo nga apektado sa service area niini.
Adunay pagkuwestiyon usab sa petitioners sa legalidad sa LWUA takeover sa miaging tuig apan gibasura kini sa korte.
Naglugwa usab sa legal opinion ang Office of the Government Corporte Counsel o OGCC diin nagpabor sa LWUA takeover.
Apan sa miaging Abril 8 ning tuiga,nagpagawas ang RTC Branch 41 sa cease and desist order batok sa LWUA intervention nga karong adlawa lang napagawas sa mga abogado sa petitioners.
