Wala matuman ni Pope Francis ang tradisyon sa paghugas sa tiil sa mga piniling apostoles sa St Peters Basilica sa adlaw sa Huwebes Santo.
Nunot kini sa desisyon sa santo papa nga duawon ang mga piniriso sa Regina Caeli ug mi-alay sa panalangin.
Sama sa gilauman, sakay gihapon kini sa iyang wheel chair, ug pag-abot sa prisohan, mipasabot kini sa iyang kalisdanan sa paghugas sa tiil sa mga piniriso.
Mahinumduman nga niadtong pang 2013 gisugdan ni Papa Francisco ang paghugas sa tiil sa mga piniriso matag Huwebes Santo.
Kagabie, nagpagawas sa press release ang Vatikano sa rason kung nganong wala makatambong sa santos nga misa sa Biyernes Santo ug Sabado de Gloria ang Santo Papa.
Gitataw sa opisina sa The Holy See nga nagpahuway lamang sulod sa iyang lawak ang Santo Papa gumikan kay dili pa 100% ang iyang pagkaayo sa pneumonia.
Mismo ang mga doktor niini ang naglimitar kaniya nga muhimo’g daghang pisikal nga kalihukan gumikan sa iyang huyang nga resistensya sa panglawas.
Una niini, wala usab mitambong sa Via Crusis sa Colosseum sa Roma si Papa Francisco human kini gitambagan nga dili magpalabi sa exposure sa publiko gumikan sa iyang sakit sa baga.
