CAGAYAN DE ORO CITY – Giakusar sa committee on environment sa konseho nga karaang kuha sa mga hulagway kabahin sa wala nangakuha nga mga basura ang gibalik-balik pagmantala sa social media.
Kini aron giingong magka-isyu lang ang pangagamhanang-lokal sa dakbayan.
Kini ang kabahin sa reaksyon ni District 1 City Councilor Roger Abaday,chairman sa committee on environment sa konseho sa special report ni District 1 City Councilor Imee Moreno sa ilang pagbalik-sesyon ning syudad.
Miingon si Abaday nga nasaksihan niini nga gilayong mi-aksyon ang city hall pagtabang aron makuha ang mga pakyas makuha nga mga basura rason nga nalimpyo na ang mga lugar diin gitumbok sa social media nga gikan sa Brgy Lapasan padulong sa Brgy Bugo.
Kini ang rason nga nakaingon ang konsehal nga karaan na ang mga kuhang hulagway ug gibalik lang pagmantala sa social media aron mohatag sa negatibo nga impresyon ngadto sa dakbayan.
Apan gilayong mi-resbak ang mainstream media sa panaghap ni Abaday.
Kini tungod kay mismo sila ang akto nakakita ug mikuha sa mga hulagway sa mga lugar diin nagtapun-og ang mga basura diin gi-post sa social media aron matawag ang atensyon sa kagamhanang-lokal.
Una niini,namahayag si Abaday nga dili gyud masulbad ang suliran sa syudad kung pasagdan sa katawhan ug kabarangayan ang kagamhanan pagpatuman sa solid waste management implementation.
Hisayrang gusto hingusgan sa city govt ang pagpatuman sa 23 anyos nang Republic Act 9003 sa dakbayan diin kabahin ang pag-imposar sa ‘no segregation,no collection policy’ sa mga basura gikan sa mga pinuy-anan o mga balay-patigayon.(Photo: Sean ‘Double S’ Sulugan).
