CAGAYAN DE ORO CITY – Nabulgar nga anaa lang sa 40 ngadto 45 ka hauling trucks sa Tencil Environmental Management ang nagdagan aron mangulekta sa basura palibot sa syudad.
Kini human magisa sa gihimong committee hearing sa konseho ang kadagkuan sa Tencil kung nganong napalpak ang pagpangulekta sa mga basura sa syudad sa miaging semana.
Sa pagisa ni City Vice Mayor Jocelyn Rodriguez kang Tencil operations manager Jermie Danuco,nasuta nga wala masunod ang 65 ka operational hauling trucks sa kontrata sa maong higayon aron mas matutukan ang suliran sa mga basura sa dakbayan.
Gani,namugos pa si Danuco nga kabahin sa angay mabasol ang kinaiya sa pipila ka tagbalay nga dili gasunod sa oras sa tinglabay sa mga basura sa dakbayan.
Sa pikas bahin,dili kuminsido si Rodriguez sa palusot sa Tencil nga naglisod sila’g apas paghakot sa mga basura tungod sa pagpasagad paglabay sa pipila ka mga residente sa dakbayan.
Miingon si Rodriguez nga kung adunay angay dukdukon sa maong kakulangon,kini walay lain ang buhatan ni CLENRO manager Engr Armen Cuenca.
Apan tubag usab ni Cuenca nga nalimitahan ang pagtubag sa isyu sa basura tungod kay wala hingpit gipatuman ang ordinansa sa syudad kabahin niini.
Namugos usab si Cuenca nga dili ensakto ang sulti ni Rodriguez nga nagpasagad ang CLENRO tungod kay daghang brgy syudad ang naningkamot pagsunod sa maong balaod.(Photo: City Information Office file).
