CAGAYAN DE ORO CITY – Gihalaran sa taas nga pagsaludo sa kasamtangang henerasyon ang pinakaunang kadaugan nga nahimo sa unang Kagay-anons batok sa pakig-engkuwentro sa tropang Amerikano sa tiilan sa Casa Real nga ilado na sa tawag nga city hall ning syudad kaganihang buntag.
Kini human panguluhi ni City Mayor Rolando ‘Klarex’ Uy ingon man ni City Police Director Col. Salvador Radam ang wreath laying ceremony sa ika-125 ka tuig nga pagdumdom sa Battale of Makahambus nga natigayon niadtong Hunyo 4,1900 sa kanhi Cagayan de Misamis nga Cagayan de Oro na sa kasamtangang panahon.
Nagsumikad ang maong lakang subay sa kasuguan usab sa National Historical Commission aron lab-ason ang maisugon nga pakig-sangka sa Kagay-anons ubos nila ni Mindanao Batallion commanders Col.Apolinar Velez ug Lt Cruz Taal kontra sa tropa ni US expedition commander Capt Walter Elliott.
Wala na mohatag pakigpulong si Klarex apan paghatag saludo ug paghalad sa mga bulak haom alang sa mga unang Kagay-anons nga nakig-asdang aron sakmiton ang pinaka-iladong kadaugan alang sa Mindanao sa maong panahon.
Subay sa kasaysayan,gisulaya’g okupar ni Elliott ang bukid sa Makahambus nga nagsilbing headquarters sa Western Division of Liber Troop sugod petsa 1 sa Hunyo 1900.
Apan nabantayan kini sa tropa ni Kagay-anon patriot Cipriano Vamenta hinungdang gi-alerto ni Hilario Mandar ang sila si Velez rason natigayon ang engkuwentro ug nasakmit ang kadaugan batok tropang Kano.(Photo by Earlier Kagay-anons)
