Dili na “ceasefire” ang target ni US President Donald Trump sa gubat tali sa Iran ug Israel.
Si Trump miingon nga “total and complete victory” ang gusto niya mahitabo sa duha ka nasud.
Sa iyang pamahayag sa Oval Office, mipasabot ang presidente nga ang ilang tinuod nga tumong mao ang pagpugong sa Iran nga makab-ot ang paggamit sa ilang nuclear weapon.
Gipasabot ni Trump nga delikado kung masugdan sa Iran ang paggamit sa maong armas, ug siya nagtoo nga taas ang tsansa nga sulayan kinig tira sa Tehran padulong Israel, kung mugrabe pa ang tensyo.
Gipalanog ni Trump nga duol na mulusad sa nuclear bomb ang Iran busa wala na siyay pasensya sa dugang pa nga negosasyon.
Wala pay pinal nga desisyon si Trump kung moapil ba ang Estados Unidos sa gubat, apan iyang giangkon nga ang US ra ang adunay kapasidad nga modaug batok sa Fordow nuclear facility sa Iran.
Hisayran nga kini nga pasilidad, nakabase sa ilawom sa bukid sa Iran ug lisod atakihon gawas kung gamiton ang mga “bunker buster” bombs sa US.
Sa laktod, ang pasabot ni Trump sa “total victory” mao ang pagwagtang sa tanang posibilidad nga makab-ot sa Iran ang armas nukleyar, bisan pa kung kini magpasabot sa dugang nga gubat, kay ang iyang baruganan klaro – mas maayo ang gubat inay tugotan ang Iran nga mahimong gamhanan gamit ang ilang nuclear power.
