Gibisita ni Presidente Ferdinand Marcos Jr., ang Marawi City, Lanao del Sur, kagahapon.
Tumong niini ang inspeksyon sa Port of Marawi, ug paghatag sa “update” sa rehabilitation efforts sa iyang administrasyon sa syudad nga unang gi-atake sa terroristang Maute-ISIS tuig 2017.
Gibutyag ni Marcos nga nalipay siya sa kalambuan sa rehabilitasyon sa Marawi, ilabi na sa pagkahuman sa P261.5 milyon nga Port of Marawi, nga karon gilangkoban na sa 8,000-square meter nga backup area, passenger terminal nga maka-akomodar sa 132 ka pasahero, fish port, lakip ang Roll-on/Roll-off (RoRo) ramp.
Gipamugos sa presidente nga ang pantalan usa lamang sa daghang proyekto nga kabahin sa Marawi Recovery, Rehabilitation, and Peacebuilding Program.
Nahisgutan usab sa presidente ang plano sa pagtukod sa dugang nga mga pantalan sa palibot sa Lake Lanao aron mapalambo ang “connectivity” sa 18 ka kasikbit nga lungsod ug mapabaskog pa ang ang kalihukan sa ekonomiya sa rehiyon.
Gawas niini, gihatagan sa deadline ni Presidente Marcos ang mga kontractors nga mitul-id sa Marawi City General Hospital nga kinahanglan kining mabuksan sa bulan sa Agosto.
Sunod nga gisusi sa presidente ang mga apektadong mga tunghaan nga sa pagkakaon, nagbukas na alang sa bag-ong school year.
