CAGAYAN DE ORO CITY – Hawid na sa transition team ni incoming Misamis Oriental Governor Juliette Uy ang mga dokumento nga nag-sentro sa kahimtang sa kapitolyo-probinsyal nga kasamtangang gidumala ni outgoing Governor Peter Unabia.
Kini human nahatagan sa katumanan ang saad ni Unabia nga itugyan ang maong mga papeles sa transition team ni Uy sulod ning adlawa.
Gikompirmar sa tigpamaba ni Uy nga si Celso Abucejo nga gidawat na nila ang maong mga dokumento kuyog ang pagtubag sa pipila ka pangutana sa mga ulo sa departamento sa kapitolyo-probinsyal.
Apan giklaro ni Abucejo nga walay bisan usa nga ilang gipirmahan sa mga papeles kay mohimo pa sila sa pagtagsa-tagsa’g susi sa mga unod niini ayha ang hingpit nga pagdawat.
Giangkon usab niini sa interbyu sa media nga adunay mga impormasyon nga dili klaro alang kanila ilabina ang aspeto sa panalapi sa kapitolyo.
Gipasalig usab niini nga adunay mga personahe sa kapitolyo nga nadestino sa nagkadiyang mga buhatan nga ipabilin una sa trabaho ilabina kadtong mga serbisyo nga dili mahimong maundang partikular sa pangihanglang panglawas sa lalalawigan.
