Gipahamtang na sa Civil Aeronautics Board (CAB) ang ₱6 milyon nga silot batok sa online booking platform nga AirAsia MOVE tungod limbungan ug sobra ka mahal nga rates sa pletihan.
Napalanog ang gi-atubang nga kontrobersiya sa maong kompanya human gireklamo sa magti-ayong – Leyte Representative Richard Gomez ug, sa iyang asawa nga si Ormoc Mayor Lucy Torres-Gomez ang pagpalit nilang duruha sa one-way tickets gikan Tacloban paingon sa Manila nga nagkantidad sa ₱77,704.
Mas taas kini itande sa presyo kung direkta silang mupalit sa airline.
Segun sa CAB, ang AirAsia MOVE nakalapas sa Air Passenger Bill of Rights ug sa mga regulasyon sa pamasahe, ug usa sa lig-ong ebidensya niini ang pagpakita sa ilang platform sa mga presyo nga sobra sa gitugot nga fare ceiling.
Bisan pa sa pasabot sa CEO sa MOVE nga si Nadia Omer nga ang problema resulta lang sa data synchronization issue sa ilang third-party pricing partners, namugos ang CAB nga kinahanglang mahimong responsabli ang ilang kompanya sa pagpakita sa matuod nga presyo sa ilang serbisyo.
Una niini, giila sa Department of Transportation (DOTr) ang aksyon sa CAB isip tin-aw nga mensahe nga wala nagpasagad ang gobyero sa pagpangabuso mga pasahero.
Gipasabot usab sa DOTr nga ang airline nga AirAsia Philippines wala’y labot sa isyu, ug ang MOVE usa lang ka affiliated booking platform.
Sa pagkakaron, ang AirAsia-MOVE nagtrabaho na aron ma-improbar ang ilang sistema ug malikayan ang susamang insidente sa umaabot.
