Dakung hulga sa ekonomiya sa Pilipinas ang pagkuyanap sa peke nga salapi nga gipamaligya “online”.
Namahayag si Atty Mark Fajardo, Payments and Currency Investigation Group Officer sa Bangko Sentral ng Pilipinas (BSP) nga kining mga suspek maoy tipik sa mga kriminal nga nagpakatag karon sa makaiilad nga salapi gamit ang black market.
Siya miingon nga ang salapi, sama sa banknotes ug silsilyo pulos mga legal nga kabtangan sa Republika sa Pilipinas.
Ang mga masupakon, pasak-an sa Kasong paglapas sa Presidential Decree No. 247, o mas naila isip defacement ug destruction sa salapi sa nasud.
Kung mapamatud-ang sad-an, ang kombiktado sa krimen magbayad sa silot nga multa hangtod ₱20,000 ug pagkabilanggo sa lima ka tuig, pataas.
Kung gihimo ang krimen pinaagi sa internet o social media, mahimong musamot ka lawom ang kaso ug kini pahamtangan sa Cybercrime Prevention Act of 2012.
Nakigkoordinar na ang BSP sa PNP Anti-Cybercrime Group (ACG) aron masiguro ang pagdakop sa mga nalambigit sa pagpamaligya ug pagpalit og peke nga salapi.
Gi-awhag ang publiko nga magmatngon ug dili mo-engganyo sa bisan unsang transaksyon nga may kalambigitan sa pekeng kwarta, ilabi na sa online platforms.
