Nadakpan sa mga otoridad ang duha ka suspek nga gituohang gun-for-hire ug gitudlong responsable sa pagpusil-patay kang Adrianne Fornillos, kanhi kandidato sa Mr. Cagayan de Oro.
Ang operasyon gipahigayon sa mga sakop sa Pagadian City Police Station, Cagayan de Oro Police Office (COCPO), ug Police Regional Office (PRO) 10, nga misangpot sa ilang pagkasikop sa dakbayan sa Pagadian.
Ang mga suspek, nga nag-edad sa 35 ug 38 anyos, pulos resident ning syudad ug giila nga mga miyembro sa usa ka grupo nga gun-for-hire.
Pinasubay sa warrant of arrest nga giisyu sa RTC Branch 17, 10th Judicial Region sa Cagayan de Oro, sila gi-akusahan sa kasong murder nga walay gi-rekomendar nga piyansa.
Unang namahayag si Police Major Byron John Ratunil, hepe sa Nazareth Police Station ubos sa COCPO nga dali ra nila na trace ang puy-anan sa duruha human sila mipasa sa “motion to admit” pinaagi sa gipangayong kontra-demanda sa korte.
Sa pagkakaron, nagtingkagol na sa prisohan ang duruha samtang nagpaabot sa legal nga proseso batok kanila.
