Nabawi sa hiniusang operasyon sa mga ahensiya sa gobierno ang kapin sa 26,000 ka sako sa bugas gikan sa Pakistan ug Vietnam sulod sa bodega sa Barangay San Roque, Talisay City, Cebu.
Subay sa gilusad nga operasyon sa Anti-Agricultural Economic Sabotage (AAES) Council, kauban ang Department of Agriculture, Philippine Coast Guard, PNP Maritime Group, ug Criminal Investigation and Detection Group, ilang nasuta nga pulos ismagol ang gipanagu-an nga mga bugas nga nagkantidad sa P38-Milyon.
Ang operasyon gipanguluhan ni Frederick Go, Special Assistant to the President for Investment and Economic Affairs, ug kini ang unang implementasyon sa Republic Act 12022, ang Anti-Agricultural Economic Sabotage Law.
Sa imbestigasyon, napamatud-an nga ang kompanyang River Valley Distribution Inc. (RVDI) wala makahatag sa kumpletong dokumento alang sa 20,562 ka sako sa bugas, nga sobra sa 6,000 ka sako nga limit sa gidaghanon sa ma-import sa nasud.
Gumikan niini, gi-andam na sa Department of Justice ang pagsang-at sa kaso batok sa mga responsabli sama sa economic sabotage ug kini usa ka non-bailable offense.
