Mipasidaan si City Mayor Rolando Klarex Uy sa tanan mga regular nga empleyado sa City Hall nga masapon nga nakalapas sa balaod sa Civil Service.
Gihimo ni Mayor Uy ang pasidaan human daghan ang posibleng matangtang tungod sa pagsigeg ka late, absent, adik sa ilegal nga druga, ug ga-inom-inom samtang ilawom pa sa office hours.
Gipaniguro ni Uy nga iyang tangtangon ang tanan masupakon, dili pinaagi sa otomatik nga desisyon apan, ipaagi niya kini sa imbestigasyon ug due process.
Mu-abag sa imbestigasyon ang ilang mga team leaders, supervisors ug ang mismong tagdumala sa Civil Service.
Una niini, dili gusto sa mayor nga magbaton sa mga tapulan ug tikasan nga empleyado kay muhatag kini sa ngil-ad nga imahe sa City Hall kung hisgutan ang pinaka-kalidad nga pagtunol sa serbisyo sa katawhan.
Dili usab exempted sa iyang “warning” ang mga empleyado nga nailhan nga iyang mga pinalabi.
