Mitaliwan na ang ilado nga astronot sa Apollo 13 nga si Jim Lovell sa edad nga 97. Namatay si Lovell sa iyang puy-anan sa Lake Forest, Illinois, sumala sa NASA. Siya usa ka beteranong astronaut nga nakahimo sa upat ka spaceflights, lakip na ang Gemini 7, Gemini 12, Apollo 8, ug ang bantugang Apollo 13. Si Lovell ang unang astronaut nga nakaabot sa upat ka beses sa kalawakan, nga misumada sa 715 ka oras sa space hangtud malabwan ang rekord sa Skylab missions. Gikan siya sa ikaduhang klase sa mga astronaut sa NASA niadtong 1962, kauban nila Neil Armstrong ug Ed White.
Si Lovell ang commander sa Apollo 13 moon mission niadtong Abril 1970, nga gilauman unta nga ikatulo nga crewed moon landing sa NASA. Apan human sa 56 ka oras sa biyahe ug 200,000 ka milya gikan sa yuta, nibuto ang usa sa oxygen tanks sa spacecraft, nga nagresulta sa pagkawala sa kuryente ug oxygen supply. Sa maong krisis, si Lovell ug ang iyang kauban nga sila Jack Swigert ug Fred Haise nakagamit sa Lunar Module aron makasurvive ug makabalik sa Yuta. Ang ilang kalisdanan gihulagway sa pelikula nga Apollo 13 ni Ron Howard, diin si Lovell gidala ni Tom Hanks.
Gipangayo sa pamilya ni Lovell ang privacy apan ilang gipadayag ang dakung garbo sa iyang kinabuhi ug kalampusan sa “pioneering human space flight”. Si Lovell nailhan sa iyang kalma nga liderato ug abilidad sa pag-atubang sa krisis, nga nakatabang sa NASA sa pagpadayon sa mga misyon sa buwan ug sa umaabot nga Artemis missions. Gibilin niya ang panultihon nga “ang milagro usa ka butang nga imong buhaton, dili lang hulaton.” Ang iyang panulondon magapadayon isip inspirasyon sa mga umaabot nga henerasyon sa mga explorer ug siyentista.
