Gidakop sa mga operatiba sa Philippine National Police (PNP) ang 28-anyos nga vlogger nga nailhan sa social media isip “Thailand Girl” sa Barangay Morales, Koronadal City. Ang pag-aresto gibase sa warrant of arrest nga gi-isyu sa Regional Trial Court Branch 52 sa Davao City, nga mubalor sa ₱48,000 ang girekomendar nga piyansa. Online Libel, ubos sa Republic Act No. 10175 o Cybercrime Prevention Act of 2012, ang gisang-at nga kaso batok kaniya.
Sumala sa Section 4(c)(4) sa RA 10175, ang cyber libel usa ka krimen nga naglakip sa pag-post og malisyoso, bakak, o daotang impormasyon online nga makadaot sa reputasyon sa usa ka tawo. Kung mapamatud-an, ang silot mahimong ikapriso sa suspek nga moabot sa unom ka tuig ug multa nga dili molapas sa ₱200,000. Ang kaso batok ni “Thailand Girl” naggikan sa reklamo sa usa ka personalidad nga giingong gibi-ay-bi-ayan niya gamit ang offensive content sa social media. Ang mga otoridad nagpasidaan sa mga content creators nga ang paggamit sa digital platforms adunay kaakibat nga legal nga responsibilidad.
Mahinumduman nga ang Commission on Elections (COMELEC) kaniadto mipadala usab sa Show Cause Order kang “Thailand Girl” tungod sa alegasyon sa vote buying niadtong Abril 2025. Gipasidaan sa mga ahensya sa gobyerno nga bisan ang mga influencer nga dili kandidato mahimong masakpan kung makalapas sa mga balaod sa eleksyon ug cyber ethics. Gidasig sa kapulisan ang publiko nga dili gamiton ang online platform o social media aron makapangdaut sa uban ug dili masang-atan sa kasong kriminal.
