Pormal nga gi-anunsyonsa Agrinanas sa Department of Labor and Employment Region 10 (DOLE-10) nga nagsira na ang ilang kompanya niadtong Agosto 20.
Kini ang gibutyag ni DOLE 10 Technical Director JV Vasallo sa Bombo Radyo.
Si Vasallo miingon nga pagkasunod nga adlaw sa Agosto 21, gibisita sa mga opisyal sa ahensya ang planta sa kompanya sa Bukidnon aron beripikahon ang impormasyon.
Napamatud-an sa team ni Vasallo nga wala na mag operar ang kompanya.
Subay sa mando ni DOLE-10 Regional Director Jeffrey Suyao, gilusad ang usa ka job fair sa maong lugar, usa ka semana ang milabay human mag sira ang Agrinanas.
Ang job fair gitumong aron matabangan ang mga natangtang nga trabahante nga makakitag trabaho.
Sa kinatibuk-an, kapin 1,645 ka empleyado ang naapektuhan, 826 ka regular o direktang gi-hire nga empleyado, ug 819 ka trabahante nga gikan sa manpower provider nga Estrellas Cooperative, ang nawad-an sa trabaho.
Niadtong Agosto 29, gilusad ang usa ka job fair nga mitutok sa sektor sa agrikultura, diin gibana-bana 300 ka aplikante ang nadawat dayon sa maong adlaw.
Dugang pa ni Vasallo nga gi-profile na sa DOLE ang 1,100 ka natangtang alang sa posibleng pag-hire kanila sa TUPAD program nga gidisenyo isip usa ka emergency employment scheme sa gobyerno.
Malaumon si Vasallo nga sa sunod semana, mapatawag na ang mga kwalipikado sa programa.
Ang pagtunol sa separation pay ipahigayon sa Setyembre 20, naglangkob sa usa ka bulan nga sweldo, 13th month pay, Uban pang incentives.
Ang payout ipahigayon sa Talakag, Bukidnon, ug gisaad ni Vasallo nga personal nga saksihan sa DOLE-10 ang distribusyon.
Gawas pa niini, ang mga kalit natangtang nga empleyado makadawat usab og ₱5,000 matag usa pinaagi sa unemployment insurance nga gihatag sa Social Security System (SSS).
