Gi-rekomendar sa Roads and Traffic Administration (RTA) nga ibalhin una ang “night market vendors” sa Cogon Public Market sa Rotonda Area, aron malikayan ang pag-goot sa trapiko samtang nagkaduol ang “holiday rush”.
Gikompirmar ni Konsehal Eric Salcedo, overseer sa RTA ang report nga adunay temporaryo nga pagbalhin, segun sa resulta sa coordination meeting nga gipahigayon, kagahapong adlawa.
Ang kabag-uhan, ipatuman sa Disyembre 15, ug kini mulungtad sa napulo ka adlaw. Kini nagpasabot nga mas luag na ang dalan sa Cogon sugd petsa 15 hangtud sa adlaw sa Pasko.
Gawas sa paghipos sa mga night market vendors, ipadayon sa RTA ang pagdakop sa mga ilegal ug ambulant vendors nga maoy usa sa hinungdan nga mabukog ang dalan sa sidewalk sa Cogon Area.
