Mipadayag sa iyang mainiton nga pagpasalamat si Jesus Nazareno Parish Priest Msgr. Nathaniel Lerio sa maayong pagsunod ug pagkooperar sa mga deboto sa mga abiso sa mga otoridad atol sa traslacion. Gibutyag ni Lerio sa Bombo Radyo nga gikalipay sa simbahan nga sa desperas pa lang sa kapistahan sa Itom nga Nazareno midagsa na ang mga deboto sa mga misa ug night vigil, ug misaka pa sa kapin 23-mil ka mga tawo ang mitambong sa procession. Sumala sa assessment, malipayon sila nga malamposong natapos ang kalihokan nga hapsay ug malinawon. Gipunting usab ni Lerio ang kahinungdanon sa kasaulogan nga nagpatigbabaw ang kalinaw ug walay kagubot, ug walay insidente sa pagpamugos o paggamit sa pwersa aron makaduol sa imahe sa Itom nga Nazareno. Gipasalamatan ug gipasidunggan usab niya ang panagtinabangay sa nagkadaiyang pwersa ug mga opisyal nga kanunayng nagmonitor aron masiguro ang kalinaw ug kahusay sa tibuok kalihokan. (JAMES OLIVER)
