Nadakpan sa kapulisan ang usa ka armadong lalaki nga gituohang responsable sa pagpanulis sa tulo ka STL outlets dinhi sa dakbayan sa Cagayan de Oro sa miaging Biyernes. Segun ni Camaman-an Barangay Kagawad ug Peace and Order Chairman Alicia Cabili, unang nanulis sa usa ka outlet sa Tomas Saco Street sa buntag ang suspek, diin nagpaka-aron-ingnong motaya apan gipakita ang armas sa dihang gipangayuan na sa bayad. IYANG nakuha ang P3,000 nga kinitaan. Sa hapon, sunod niyang gitulis ang lotohan sa Barangay Camaman-an, diin nasakmit niya ang P7,000 nga kita gamit gihapon ang armas. Giingon sa kapulisan nga ikatulo niyang target ang usa ka STL outlet sa Macasandig, diin didto na siya nadakpan. Gawas sa armas, narekober usab gikan sa suspek ang gituohang ilegal nga droga. Padayon pa ang imbestigasyon sa kapulisan aron matino kinsa ang iyang mga kauban ug kung miyembro ba kini sa organized crime group nga boot manghasi sa kagubot sa syudad. (JAMES OLIVER)
