Gikondena sa grupong United People’s Initiative (UPI) ang pagdumili ni Presidente Ferdinand Marcos Jr. sa pagpa–hair follicle drug test, nga usa sa mga argumento nga nalakip sa gi-file nga impeachment case batok sa pangulo.
Namahayag si UPI Secretary General Capt. Rey Valeros Jr. sa iyang interbyu sa Bombo Radyo nga angay unta mahimong ehemplo ang pangulo sa pagsunod sa balaod, apan pakyas matod pa siya sa pag-angkon sa tulobagon ug pagpamatood sa katawhan nga walay basehan ang mga alegasyon nga siya usa ka drug addict.
Butyag ni Valeros nga kung unsa ka hugot ang mga rekisito sa drug testing sa ordinaryong mga Pilipino alang sa pagkuha og trabaho ug lisensya, maoy angay usab ipatuman sa pangulo, kay dili siya exempted sa balaod.
Dugang pa niya, kung taas ang mga pamantayan nga gipahimutang sa katawhan, angay usab nga musunod ang pangulo sa maong standards, ilabi na nga siya naghupot sa pinakataas nga posisyon sa nasud.(James Oliver)
