APEKTADO ang kapin sa 1,800 ka mga empleyado sa Kapitolyo Probinsyal sa Misamis Oriental tungod sa pagkibhang sa annual budget alang sa tuig 2026.
Sumala ni Misamis Oriental Board Member Dexter Yasay, bisan pa man sa kakulang sa pwersa sa mga Job Order employees sa probinsya, dili na siya matingala nga nagpagawas og memorandum ang Gobernadora nga dili na ipatrabaho ang pipila ka mga empleyado tungod kay wala na’y igasweldo alang kanila.
Dugang pa ni Yasay, makatarunganon lang nga ipahunong una ang pag-duty ug pag-hire sa mga Job Order employees sa Kapitolyo, ilabi na kung naglisod na gani ang probinsya sa pagpasweldo sa miaging tuig bisan aduna pa’y igo nga pondo.
Gipunting usab niya nga mas naglisod karon ang probinsya sa pagpasweldo sa mga Job Order ug casual nga mga empleyado human nakibhang ang proposed budget alang karong tuiga.
Dumduman nga nahimong dakong isyu sa probinsya sa miaging tuig ang pagka-delay sa sweldo sa mga Job Order employees sa Kapitolyo, ilabi na sa mga nurses sa walo ka mga provincial hospital sa Misamis Oriental. (James Oliver)
