MI-ABISO ang Department of Health (DOH) Bureau of Quarantine nga nagpadayon ang ilang pagbantay sa tanang tugpahanan ug pantalan tungod sa gi-report nga seasonal outbreaks sa “Nipah virus” sa Bangladesh ug India.
Ang maong sakit giila isip “zoonotic”.
Kini nagpasabot nga gikan sa hayop mahimong matakdan ang tawo, ug kasagaran gikan kini sa paniki o “bats” nga makatakod usab sa baboy ug kabayo.
Ang mga sintomas sa NIPAH Virus naglakip sa grabe nga hilanat, pagsusuka, ug respiratory infection.
Sa Pilipinas, ang ulahing kaso niini natala pa sa Sultan Kudarat niadtong 2014 diin adunay 17 ka kaso.
Gisiguro sa DOH nga andam sila sa pag-atubang sa Nipah virus ug uban pang sakit.
Sa pagkakaron, walay internasyonal nga rekomendasyon alang sa travel restriction.
