Inay mangayo’g pasaylo, gikondinar ni United States President Donald Trump ang nag-repost sa iyang video kalabot sa documentary sa gi-akusar nga peke nga eleksyon niadtong 2020.
Ang video nga gipost sa Truth Social account ni Presidente Trump, kundiin mulungtad kini sa usa ka minuto nga video clip nga nagpalanog sa peke nga alegasyon nga siya giilad ug gikawat kaniya ang tsansa nga mahimong mananaug isip presidente sa maong piliay.
Sa katapusan niini, adunay usa ka split-second nga eksena nga nagpakita kang Barack ug Michelle Obama nga gibutang ang ilang mga nawong sa mga lawas sa mga unggoy nga nagkanta ug nagdula sa jungle, nga gisumpay sa kanta nga The Lion Sleeps Tonight.
Ang video nagpasabot nga ang Obamas adunay kalabutan sa giingon nga voter fraud.
Ang White House una nga nagdepensa sa post ug giingon nga kini “fake outrage,” apan human sa kusog nga kasuko gikan sa duha ka partido, gi-delete kini sa paglabay sa 12 ka oras.
Si Trump mismo miingon nga iyang gi-condemn ang “racist parts” sa video apan wala siya mangayo ug pasaylo, ug gipamugos nga “wala siya nakasayop.”
Namugos si Trump nga nasayop lang sa pagpost ang iyang staff, apan, ang video nakadani sa agresibong kondemnasyon gikan sa kaliwatang black American.
Lakip sa reaksiyon ang pagtawag kang Trump nga racist ug pagbaton sa dili propesyonal nga mga staff sa Opisina sa Presidente.
