MAPASALAMATON ang Provincial Disaster Risk Reduction and Management Office (PDRRMO) sa Misamis Oriental human nga nabag-o ang forecasted track sa Bagyong Basyang ug wala na miagi sa probinsya.
Sumala ni Jun Sotsot Dy, hepe sa PDRRMO, bisan paman wala miagi ang bagyo sa Misamis Oriental, nagpadayon gihapon ang probinsya sa preventive measures, lakip ang pag-evacuate sa daghang pamilya gikan sa flood-prone areas.
Giingon ni Dy nga uban sa mga evacuees wala gayud nabahaan, apan misunod lang sa giya sa ilang barangay alang sa seguridad.
Sa laing bahin, giingon usab ni Dy nga wala magpasagad ang gobernadora sa probinsya sa paghatag og ayuda sa mga naapekohan sa baha. Mapasalamaton ang probinsya sa koordinasyon ug aktibong pagtinabangay sa tanang ahensiya nga nirepondi dayon sa panahon sa bagyo.
