GIPASABOT sa Filipino-Chinese nga abogado nga si Samson So Tan ang ilang mga tinoohan ug tradisyon matag pagsaulog sa Chinese New Year, nga sukwahi matod pa sa naandan sa kadaghanan panahon sa Enero uno.
Sumala ni Tan, dako og importansya sa Chinese New Year ang mga simbolo ilabi na ang mga pagkaon nga ginabutang sa lamesa sama sa manok, isda, bugas, paa sa baboy ug tikoy. Matod pa niya, dili tinuod nga ang paghanda og manok makadala og malas.
Sa tradisyon sa pipilang Pinoy, ang manok ginatan-aw nga simbolo sa “isang kahig, isang tuka,” apan sa ilang pagsabot nagpasabot kini sa pagpaningkamot, pagmata og sayo ug paglihok aron manarbaho.
Dugang pa niya, ang isda nagrepresentar og luwas ug malinawon nga panaw, samtang ang baboy simbolo sa prosperity o kauswagan. Ang tikoy usab nagpasabot sa paghiusa ug panagkahiusa sa pamilya.
Matod ni Tan, ang maong mga simbolo dili lamang bahin sa handa kondili pahinumdom sa pagpaningkamot, pag-ampo alang sa panalangin, ug paglig-on sa relasyon sa pamilya matag pagsugod sa bag-ong tuig sumala sa Chinese nga kalendaryo. (James Oliver)
