GIPASABOT ni Zia Alonto Adiong nga walay political clan sa nasud ang adunay legal nga gahum sa pagnominar og bisan kinsang miyembro sa ilang pamilya aron mudagan sa pwesto sa gobyerno.
Sumala sa chairperson sa House Committee on Suffrage and Electoral Reforms, posible gihapon nga makakandidato ang usa ka indibidwal nga gikan sa political family kon siya nominado sa usa ka rehistradong partido o pinaagi sa certification of acceptance nga gipagawas sa partido o grupo sa katawhan.
Gipunting ni Adiong nga dili pamilya ang naghatag og nominasyon kundili ang partido o ang mga botante nga nagpaluyo sa kandidato, subay sa nagluntad nga balaod ug regulasyon sa Commission on Elections.
Iyang giila nga usa sa mga hagit karon ang kalibog sa sistema, ilabi na kon adunay direktiba ang Comelec nga ikanselar ang nominasyon sa usa ka politiko nga may kalambigitan sa dinastiya, apan adunay posibilidad nga ma-re-nominar kini pinaagi sa laing partido o party-list.
Nagpasabot si Adiong nga importante ang klarong interpretasyon sa balaod aron malikayan ang kalibog sa publiko ug masiguro ang patas nga proseso sa eleksyon. (James Oliver)
