Nagpabiling kalmado ang mga overseas Filipino workers sa Middle East bisan sa nagpadayon nga tensyon tali sa United States, Israel ug Iran.
Sumala sa OFW sa Kuwait nga si Charise Egana, aminado siyang nakabati og kahadlok ug hulga sa ilang kinabuhi tungod kay padayon silang makadungog og mga pagbuto ug mga sirena samtang nagpadayon ang kagubot nga nakaapekto na sa daghang lugar sa rehiyon.
Apan matud pa niya, nagpabilin gihapong kalmado ang mga residente sa Kuwait lakip na ang mga OFW nga anaa didto, samtang nagpadayon sila sa pagmonitor sa sitwasyon.
Gipaabot usab nila ang opisyal nga abiso gikan sa gobyerno sa Kuwait kon gikinahanglan na ba ang pag-evacuate sa pipila ka lugar.
Samtang nagkasamot ang tensyon, usa ka drone ang mitira sa Kuwait International Airport partikular sa Terminal 1, hinungdan sa pagkaangol sa pipila ka empleyado ug pagkadaot sa pasilidad.
Bisan pa niini, samtang giabisuhan ang ubang katawhan nga magpabilin sa ilang mga panimalay, padayon gihapon sa pagtrabaho ang pipila ka mga OFW sa Kuwait samtang nagbantay sa sunod nga kalamboan sa kahimtang
