Suportado ni Department of Interior and Local Government (DILG) Secretary Juanito “Jonvic” Remulla ang gihingusgan nga Anti-Political Dynasty Bill sa Kongreso ug Senado.
Namahayag si Remulla nga motuman ang iyang pamilya kon kini mahimong balaod.
Alang kaniya, wala na silay mahimo kon kini ma-implementar, kay bisan miabot na sa tulo ka dekada ang ilang pagserbisyo sa katawhan, gikinahanglan nga sundon ang balaod.
Gani, iyang gikompara ang sugyot sa usa ka dakong kometa nga miigo sa kalibutan, ug kini mao’y iyang gibati karon.
Hisayran nga gitataw ni Remulla ang iyang baruganan taliwala sa kamatuoran nga ang iyang pamilya iladong political family sa lungsod sa Cavite.
