Arestado ang tulo ka Pilipino nga miangkon nga nakig-uban sa Chinese Intelligence aron mangolekta ug maghatag sa sensitibong impormasyon kabahin sa operasyon sa Pilipinas sa West Philippine Sea, sumala kini sa National Security Council (NSC).
Sumala ni NSC spokesperson Assistant Director General Cornelio Valencia Jr nga ang mga suspek adunay koneksyon sa Department of Defense (DOD), Philippine Navy (PN), ug Philippine Coast Guard (PCG), diin nakuha nila ang listahan sa mga tauhan ug detalye sa rotation and resupply missions.
Matod sa NSC, napugngan na ang espionage ug uban pang foreign-directed malign activities samtang nagpadayon ang imbestigasyon ug posibleng kasong ipasaka.
Namahayag usab ang Armed Forces of the Philippines (AFP) nga nag-evolve na ang espionage gamit ang modernong teknolohiya sama sa cyber tools, surveillance devices, International Mobile Subscriber Identity catcher, ug nagpadayon ang koordinasyon sa lain-laing ahensya aron mas mapalig-on ang pagbantay ug imbestigasyon. (Phillip Ariata)
