Nabati na sa mga drivers ug operators ang kasakit sa pagsaka sa presyo sa lana, epekto sa pagnihit sa supply lana tungod gubat sa Middle East. Kini ang gitug-an ni Dante Sudaria, ang chairman sa Mindanao Daily Express Transport Cooperative (MINDEX) transport. Miingon si Sudaria nga halos wala nay kinitaan ang ilang mga miyembro tungod sa pagsaka sa presyo sa produktong petrolyo. Gumikan niini, mi-apelar si Sudaria sa nasudnong gobyerno nga paspasan ang ilang himoong lakang aron maluwas ang kahimtang dili lang sa ilang grupo, apan lakip na ang uban transport group nga grabeng naapektuhan sa oil price hike. Taliwala sa pagsaka sa presyo sa lana, walay laraw ang MINDEX nga manawagan sa fare hike kay nasayud sila nga dugang palas-unon kini sa mga sumasakay. Naghulat lang ang grupo sa abiso gikan sa Land Transportation and Franchising Regulatory Board (LTFRB) kalabot sa fare increase. Hisayran nga subay sa pagpanubay sa Bombo News Team ang pinamahal nga krudo mapalit na sa dul-an usa ka gatos ug ang pinaka barato anaa sa kapin 70 pesos kada litro.
