Nagpasidaan si LTFRB Regional Director Aljo Bendijo sa mga drayber ug operators sa pampublikong transportasyon nga dili magpataka og patong sa pasahe tungod kay supak kini sa balaod ug posibleng mosangpot sa bug-at nga kaso.
Sa interbyu sa Bombo Radyo, giingon ni Bendijo nga bisan og naglisod karon ang sektor sa transportasyon tungod sa pagsaka sa presyo sa fuel, dili gihapon tugotan ang pagpatong og pasahe nga walay aprobasyon sa Land Transportation Franchising and Regulatory Board.
Matod pa niya nga ang mga drayber nga mapamatud-an nga nagpatong og iligal nga pasahe mahimong atubangon ang administratibo ug kriminal nga kaso.
Dugang pa niya nga posible usab nga mabawi ang ilang prangkisa tungod kay paglapas kini sa ilang Certificate of Public Convenience (CPC) nga maoy permit aron makapamasada.
Gipasabot sa opisyal nga ang paglapas sa maong regulasyon dili lamang magdala og penalidad apan mahimong hinungdan sa pagkawala sa prangkisa sa operator ug driver.
Tungod niini, gitambagan ni Bendijo ang mga drayber nga maghulat sa opisyal nga desisyon sa ahensya kabahin sa mga petisyon sa fare adjustment imbis nga magpataka og patong sa pasahe.
Gipahimangnoan usab niya nga padayon karon ang pagbantay sa mga otoridad lakip ang LTFRB ug Highway Patrol Group aron masuta ang mga drayber nga naglapas sa balaod sa pasahe sa pampublikong transportasyon. (By James Oliver)
