Gihulagway ni Atty. James Judith, kanhi konsehal sa Dakbayan sa Cagayan de Oro, nga morag telenovela ang dagan sa impeachment proceedings batok kang Vice President Sara Duterte, ilabina kung lantawon ang mga alegasyon ni Ramil Madriaga.
Matod pa ni Judith, ang mga gipresentar nga alegasyon naglangkob lamang sa gitawag niyang “bare faced allegations” nga kulang sa lig on nga documentary evidence aron masustentohan ang mga pahayag sa affidavit.
Dugang pa niya, bisan pa man og kulang sa ebidensya, kinahanglan sabton nga ang impeachment dili lamang legal nga proseso kondili usa ka political nga dula nga nagdepende sa gidaghanon sa suporta sa mga maghuhukom.
Alang kang Judith, klaro na daan ang mahimong resulta sa maong proseso: kon adunay igo nga numero ang mayorya nga pabor sa impeachment, posible gyud nga madayon kini bisan unsa pa kahuyang o kalig on ang ebidensya.
Giingon pa niya nga kung “luto” na gayud ang proseso kaniadto pa, wala nay rason nga dili masipa sa posisyon si Vice President Sara Duterte.
