CAGAYAN DE ORO CITY – Gikasubo ni City Mayor Rolando ‘Klarex’ Uy ang dakong sunog nga miigo sa daghang pamilya sa duha ka lokasyon sa Brgy Lapasan ug sa Saint John,Brgy Puntod sa dakbayan.
Kini human kompirmado nga adunay residente nga senior citizen nga namatay sa heart attack ug pipila ang samaron sa pag-igo sa sunog sa San Isidro Labrador ingon man Lapaz 1 sa Brgy Lapasan sa syudad sa miaging Martes sa gabii.
Gibutyag ni Janboy Actub,tigpamaba ni Mayor Uy nga gawas sa mga pasiuna ug dinalian nga tabang sa kagamhanang-lokal, mohandos usab sa sulat ang buhatan sa ehekutibo sa opisina ni City Vice Mayor Jocelyn ‘Bebot’ Rodriguez aron ihangyo ang paglugwa sa porsyon sa calamity quick response funds nga magamit sa mga nasunugan.
Hinoon,giklaro ni Actub nga dili managsama ang kantidad sa ayudang-salapi nga matunol kay mag-basi man usab kini sa kapas sa dakbayan ug damyos nga nahiaguman sa mga biktima sa trahedya.
Una niini,anaa sa nagkadaiyang covered courts ang mga biktima nga gilakipan sa 203 ka pamilya sa Brgy Puntod ug 202 sa Brgy Lapasan isip ilang temporaryong pahimutangan epekto sa trahedya.
Dumduman nga unang gitudlo sa pipila ka residente nga nagsumikad sa gipuy-an nga balay sa usa ka alyas Mamat ang pag-ulbo sa kalayo nga hinungdan sa dakong kahasol sa katawhan sa duha ka brgy.
Gitumbok usab ni CdeO District Fire Marshal Senior Supt Christopher Regencia nga anaa sa 3.5 milyones pesos ang structural damages sa kabalayan nga nalamoy sa kalayo sa Brgy Lapasan ug Brgy Puntod.
Tipik sa gitutukan sa Bureau of Fire Protection nga hayan hinungdan sa sunog ang illegal electrical connection.
Hisayrang daghang higayon nang naigo sa sunog ang maong mga duluna sa milabay’ng mga katuigan.
