Nanawagan ang grupong Makakalikasan Movement sa lokal nga kagamhanan sa Cagayan de Oro nga tun-an ug hatagan sa pagtagad ang nagkagrabeng polusyon sa hangin sa syudad.
Matod ni Orlando Ravanera, national chairman sa grupo, kinahanglan nga adunay tukmang pagtuon ug pagsukod sa kahimtang sa hangin aron masayran ang tinuod nga lebel sa polusyon ug mga tinubdan niini.
Giingon niini nga kon mapasagdan kini, posibleng mosaka ang kaso sa mga sakit ilabi na sa kabataan, mga tigulang ug mga adunay huyang nga panglawas.
Gipamugos usab ni Ravanera nga ang padayon nga pagkawala sa kakahuyan usa sa dakong hinungdan sa kadaot sa palibot, busa nanawagan siya sa tanan nga magtinabangay aron mapreserbar ang kinaiyahan ug mapanalipdan ang panglawas sa katawhan.
