Misaka na sa P6.6-milyon ang kadaut sa agrikultura sa Albay tungod sa padayon nga pag-alboroto sa Mayon Volcano.
Base sa datos sa Provincial Agricultural Office, grabe ang epekto sa mga tanom sa humay ug high-value crops sa Camalig, Guinobatan ug Daraga diin 87-ka mag-uuma sa humay ang direktang naapektuhan.
Dako usab ang kadaut nga gidala sa abog gikan sa bulkan nga mitabon sa mga tanom sama sa talong, sili, okra ug mais nga daghan unta ang anihon apan nadaot tungod niini.
Sa pagkakaron, padayon nga gibantayan sa mga awtoridad ang sitwasyon samtang nagpabilin sa Alert Level 3 ang Bulkang Mayon nga nagpasabot nga adunay hulga sa pagbuga sa lava, abo ug uban pang delikadong aktibidad. (phillip ariata)
