Walay kabutangan ang kalipay ni Akbayan Party-list Representative Dadah Kiram Ismula sa nagmalampusong jetski flag ride sa Pag-asa Island, isip kabahin sa ikaupat nga civilian mission sa grupong Atin Ito ngadto sa West Philippine Sea niadtong katapusan sa bulan sa Abril.
Sumala ni Ismula, pinaagi sa maong aktibidad natuman sa ilang grupo ang kanhing damgo ni dating Presidente Rodrigo Duterte nga makaduaw sa West Philippine Sea sakay og jetski.
Iyang gipasabot nga ang simbolikong kalihukan nagpakita sa malinawon apan lig-on nga pagbarug sa mga Pilipino alang sa soberanya ug teritoryal nga katungod sa nasod.
Dugang pa niya, isip usa ka Mindanawon ug babaye, dako kaniya ang kahulugan sa pagdumala sa maong misyon nga nagpakita sa panaghiusa ug kaisog sa mga sibilyan.
Giingon usab ni Ismula nga ang jetski flag ride usa ka mensahe nga ang West Philippine Sea kabahin sa teritoryo sa Pilipinas ug adunay katungod ang mga Pilipino nga makaadto niini.
Tungod niini, nagpadayon ang Atin Ito sa ilang mga kalihukan aron mapalig-on ang kahibalo ug suporta sa publiko alang sa nasodnong soberanya.
