Nagpadayon ang hugot nga preparasyon sa DepEd Region 10 alang sa umaabot nga Palarong Pambansa subay sa suporta sa mga opisyal sa rehiyon nga mapakita ang kusog sa mga atleta gikan sa Northern Mindanao.
Matod ni Rommel Aclo, program head sa DepEd Region 10, bug-os nga nakatutok karon ang tibuok rehiyon aron masiguro nga andam ang mga atleta sa lainlaing kompetisyon nga ilang atubangon ning tuiga.
Gilaraw usab sa maong buhatan ang mas lig-on nga koordinasyon uban sa mga coaches, trainers ug school officials aron mas mapalambo pa ang kahimtang sa ensayo ug disiplina sa mga magdudula sa rehiyon.
Gitataw ni Aclo nga dakong tabang ang suporta gikan sa mga lider sa rehiyon sama ni Misamis Occidental Governor Henry Oaminal Sr. nga padayon nagdasig sa mga delegado nga ipakita ang ilang talento ug determinasyon atol sa nasudnong patimpalad.
Dugang pa niya, dako usab og papel ang pagtinabangay sa mga stakeholders aron masiguro nga mabati sa mga atleta ang suporta sa tibuok rehiyon isip kabahin sa ilang pagtinguha nga makadala og dungog alang sa Northern Mindanao.
