Gustong paimbestigahan sa Cagayan de Oro–Federation of Taxi Drivers Association (CAFETADA) ang “double entries” nga nadawat sa pipila ka taxi drivers gikan sa fuel subsidy program sa LTFRB.
Sa interbyu ni CAFETADA President Bernie Jamaca sa Bombo Radyo, iyang gibutyag nga tungod sa nahitabong double entries diin naka‑dawat ang pipila ka drivers og ₱5,000 pinaagi sa e‑wallet ug ₱5,000 nga cash, napalangan ang distribusyon sa maong ayuda.
Rason nga karon, 35% palang sa mga taxi drivers ubos sa CAFETADA ang nakadawat sa subsidy.Dugang pa ni Jamaca, daghan pa ang wala makadawat sa maong ayuda ug mismo siya wala pa makadawat niini.
Rason nga gusto nilang paimbestigahan ang proseso tungod kay matod pa niya dili makatarunganon nga adunay uban nga nag‑double ang nadawat samtang daghan pa ang wala makadawat sa ayuda nga dakong tabang unta kanila karong panahona.
Hisayran nga karong Lunes, magpadala og sulat ang CAFETADA ngadto sa buhatan sa LTFRB aron maimbestigahan ang maong double entries sa ayuda nga nadawat sa ilang mga kaubanan.
