Wala mapugngi ni Atty. Joel Mahinay sa Union of People’s Lawyers in Mindanao (UPLM) ang iyang kabalaka sa kalidad sa mga senador nga kasamtangang naglingkod sa nasud, tungod sa nagkagrabeng mga kontrobersiya sulod sa Senado.
Matod ni Mahinay, ang mga senador unta angay nga mahimong ehemplo sa katawhan, ilabi na kay sila gilantaw nga mga elite leaders ug posible pang mahimong sunod nga mga presidente sa nasud.
Apan, imbes nga mahatagan og klaro ug maayong direksyon ang mga isyu sa Senado, mas nakita hinuon sa publiko ang kagubot ug panagbangi tali sa pipila ka mga lider.
Gipasabot usab niya nga makapaguol ang mga nahitabo karon tungod kay naapektuhan ang kredibilidad sa Senado isip usa sa labing importante nga institusyon sa gobyerno.
Dugang pa niya, dako ang paglaum sa katawhan nga mobalik ang lig-on nga prinsipyo, dignidad, ug maayong liderato nga kaniadto makita sa mga magbabalaod sa nasud.
